Johanne Karlsrud
Eg er ute av trening. Eg har gløymd korleis det var å ha ein blogg. Det er altså ikkje som å sykle; at ein aldri gløymer. Men eg har aldri vore særlig god til å sykle heller. Eg sa ein gong at eg er betre til å vere stille enn til å prate, men når eg sa det høgt visste eg ikkje lengre om det var sant.
Gjekk 10 km gjennom mosegrodd lavastein, haika til andre sida av øya, såg fyrverkeri over Vatnajökull, åt dirty burgers, rømde frå australske menn som berre vil snakke å haike gjennom om Canada, tok feil sti i Hveragerði, gløymde regnjakka på ein bussholdeplass, venta på buss, drakk kaffi, fekk ein ny venn.
Fire døgn, 1 500 km. Eg har så mykje bilder som eg skal sortere og hygge meg med over ein kopp kaffi søndag morgon. Men ein liten smugstart kjem her, frå det geotermiske området Krafla nær Myvatn. Island er det vakraste eg veit.
Resten av dei kornete svartkvittbileta eg tok på Island i august. Lengtar sånn pittelitt.
Fire fantastiske oktoberdagar på favorittøya. Seks veker sidan forrige visitt, skal klare å halde meg heime litt lengre denne gongen. Trur eg.
I august var eg tilbake på Island, og heim igjen tok med meg ein kornete svartkvittrull. Det var etterlengta gjensyn, rykande varme kjelder, seine netter, skarpe vulkanar og mjukt seinsommarlys. Alt eg ønska meg pluss litt til, allereie første oktober skal eg tilbake endå ein gong. Og kanskje om eit år flyttar eg igjen, det er ein skummel fantastisk tanke. Island tar pusten frå meg på ein annan måte enn eg visste gjekk an.
Utan lappen var eg pent nødt til å få rundreisinga på Island til å fungere med buss, og det vart langt ifrå så problematisk som eg hadde frykta. Her kjem ein liten tips-guide med favoritt-bussturane mine ut frå Reykjavík. Dette er berre dagsturar, lengre turar får også eit eige innlegg. Eg vil anbefale å bruke Sterna travel (http://www.sternatravel.com/) som tilbyr mange av turane sine i minibuss + at ein kan kjøpe busspass og hoppe av og på bussane deira som ein vil.
Snæfellsnes
Snæfellsjökull, Ólafsvík, Grundarfjörður, Stykkishólmur
Her får ein Island-kysten nordover, og alt er litt hardare og spissare samanlikna med dei sørlege traktene i Reykjavík-området. Små fiskevær, vulkanar, klipper og store mosesletter. Det er så opent og trongt mellom fjella på ein gong, som alle delar av Noreg pressa saman på ei lita kystlinje. Landskapa kjend frå filmen The secret life of Walter Mitty finn du hovudsakleg her, og det er til og med endå vakrare enn dei ser ut på film. Lovar.
–
Reykjanes Penninsula
Reykjanes, Gunnuhver, Bláa Lónið
Dette er den første reisa ut av Reykjavik eg tok når eg kom til Island i august, og vart den staden eg besøkte igjen og igjen fordi eg vart hovudstups forelska. Bussane kjøyrer langs kysten ut frå byen og til spissen av Reykjanes, der ein utfoskar litt ved fyrtårnet og blir møtt av eit klippelandskap karakteristisk for Island. Det ser om lag ut som nokon har rive vekk ein del av kystlinja og etterlatt eit gapande sår. Men så så vakkert. Vidare finn ein rykande kokande gjørmegrunn og dampopningar ved dei varme kjeldene Gunnuhver, og turen endar ved den blå lagune der ein anten kan hoppe på ein buss tilbake til Reykjavik eller besøke kjeldene først om ein ønsker.
South Coast
Skógafoss. Dyrhólaey, Vík, Sólheimajökull, Þorvaldseyri, Seljalandsfoss
Reisa går langs Island-kysten sørover, og her får ein nesten alt ein bør sjå på Island i ein sving. Fossar, vulkanar, klippelandskap, vulkanske sandstrender og isbre. Sjansen er stor for at ein her får oppleve den fantastiske grøne tåkete sida av landet, og ein må vere førebudd på fleire værskifte når ein reiser ei så lang strekning langs kysten. Det er mykje på ein gong så eit tips frå meg er å legge frå seg kameraet litt og berre oppleve nokre stopp også.
Golden Circle
Nesjavellir, Þingvellir, Geysir, Gullfoss
Sjølv om dette er den mest oppbrukte turistturen i verda må den nesten vere med på tipslista. Om ein klarer å lukke augene for turistane og velje seg ein dag der det ikkje er så kjempemange som reiser er dette igrunn ein veldig vakker rundtur. Den går innover i landet og stoppar ved dei tre store, Þingvellir, Geysir og Gullfoss. Når ein reiser innover i landskapet møter ein på den store rifta som deler Island i to (spesielt synleg ved Þingvellir) – eit fenomen som er like facinerande som det er mektig å sjå på. Bottom line, det er ikkje Geysir og Gullfoss sin feil at alle turistane har blitt einige om at dei må dit helst i går – dei er verd eit besøk.
I august har eg booka reise tilbake til Island og Reykjavík, og eg klarer eigentleg ikkje vente. Denne vesle øya har gjort eit usletteleg inntrykk på meg. August er den perfekte månaden for ny inspirasjon før ferien er over. Heldigvis er det nesten ein heil sommar igjen å nyte medan eg ventar.
Reykjavik er ein liten by, og etter eit halvt år vart eg godt kjend med det meste av den. Eg har brukt mykje tid på å setje saman ein ordentlig guide, og håpar den kjem til nytte for nokon! Reiser å ta ut av byen kjem i ein eigen liten guide.
Hallgrímskirkja
Eiríksgata
Ei ganske annleis og minimalistisk kyrkje. Eg tykkjer ho er heilt fantastisk både utanpå og inni – gløym ikkje å nyte synet av orgelet om du går inn (noko som er gratis). Ein kan også ta ein tur opp i tårnet for 700 ISK og få ei nydeleg utsikt 360 over Reykjavik. Det er ikkje trepper, men heis, som er litt rart men også ganske fint om ein har med seg reisefølgje som er dårleg til beins (besteforeldre for eksempel).
–
Sundhöll Reykjavíkur
Bergþórugata
Badebassenget eg kjøpte meg klippekort til under opphaldet. Det er mest sentrumsnært og har innandørs basseng pluss to hotpots utandørs. (les: alle svømmebasseng på Island har hotpots og naturleg varma basseng – og dei er svært kry over dei)
–
Laugardalslaug
Sundlaugarvegur 30
Eit større utandørs basseng om ein skulle ønske litt meir areale å boltre seg på! Ligg litt utanfor sentrum, men er lett tilgjengeleg med buss om det ikkje skal vere praktisk å gå 40-45 minuttar.
Norræna Húsið
Sturlagata 5
Ein fin liten spasertur langs tjernet i midten av Reykjavik fører deg til høgskuleområdet – og dette huset. Teikna av Alvar Aalto og absolutt verd eit besøk. Det er ofte opera-konsertar her, og ei lita utstilling i kjellaren, men sjølve huset er hovedattraksjonen. Nydeleg blanding av mørkt tre, glas og betong, i alle fall arkitektur eg er stor fan av.
Tips: sett deg på ein vindusplass i Aalto Bisto og ta ein brus medan du ser utover byen. Dette er akkurat langt nok frå bykjerna til at du får eit overblikk – og det er eit vakkert skode.
Harpa
Austurbakki 2
Konserthuset er eit imponerande bygg, og ligg i eit område det er vakert å spasere på dagar der vinden ikkje bles deg i bakken.
–
Solfar
Sæbraut (gangstien)
Skulpturen av Jón Gunnar Árnason ligg ved vatnet og tilbyr ein vakker utsikt til fjella og øyene utanfor Reykjavik. Absolutt verd ein spasertur, men OBS – her bles det alltid frå havet.
–
Listasafn Reykjavíkur (Reykjavik art museum)
Hafnarhús – Tryggvagata 17
Kjarvalsstadir – Flókagata 24
Ásmundarsafn – Stígtun
Utstillingane endrer seg ofte, med unntak av nokre faste. Dei er flinke til å plukke ut og vise islandske kunstnarar!
–
Micro Bar
Austurstræti
Øl! Mikroøl! Her har dei alltid 10 forskjellige på tapp og ein haug på flaske. Samanlikna med mange andre stader er 10 kanskje ikkje så mykje – men det er det meste du får i Reykjavik! Alkoholprisane er som norske.
Tips: bestill smakebrett på anten 5 eller 10 små glas med prøvar av tapp-ølet, eller gå for 0,33 framfor 0,5-glas med øl så får ein smakt litt forskjellig.
Reykjavik Roasters
Kárastígur 1 (Frakkastígur)
Den beste kaffien i Reykjvavik. Dei brenner bønnene sjølv (som namnet indikerer) i lokalet med ein ganske kosleg blå kaffibrennar. Dette foregår omtrent tre gonger i veka, så sjansen er stor for at ein får sildrande kaffibønner som soundtrack til kaffien. Elles spelar dei vinyl, som er ganske bra bakgrunnsmusikk det også. Lokalet er mellomstort, og i turistsessongen må ein rekne med å måtte dele bord med fleire eller satse på takeaway. I vintermånadane er dette det ultimate krypinn der ein kan ta med seg datamaskin og notatbok og arbeide i timesvis (det er stikkontaktar for lading ved fleire av borda)
Tips: det er fleire bord bak disken, ikkje gje opp å få plass før du har sjekka der. Her får du handbrygga kaffi, gå for Kalita eller Aeropress om du vil ha svart. Om de er to eller fleire går det an å bestille ein stor Kalita på deling!
–
Nora Magasin
Pósthússtræti 9
Liten men bra meny, veldig gode hamburgarar. Bar er det også, så dei har eit godt utval av bra drikke til maten.
–
Bakarí Sandholt
Laugavegur 36
Om ein vil ete frukost ute er dette det beste alternativet. Servicen er litt over gjennomsnittleg surrete og styr unna kaffien (!) men alt anna er himmelsk. Ein får ikkje den klassiske egg-og-bacon-frukosten her, men om ein skulle kjenne seg meir i det moduset når ein kjem fram er det berre å smyge seg rett over gata til Tíu Droppar – der har dei!
Tips: om du ønsker yoghurt (med müsli) bestill Skyr (med müsli) i staden! Mykje betre.
Grillmarkaðurinn
Lækjargata 2a
Dyr men så himmelsk god mat. Ein bør unna seg ein tur her om ein har råd. Og sjølvsagt: kom svolten! Om ein er her i sommarhalvåret kan det vere lurt å bestille bord for sikkerheits skuld. Men på generell basis blir det sjeldan heilt fullt ein stad i Reykjavik. (med unntak av Reykjavik Roasters)
Pizzastaðurinn á Hverfisgötu 12
Hverfisgata 12
Her finns det masse rar og bra pizza. Huset kan vere vanskeleg å finne, då det er veldig anonymt. Staden har ikkje eingong eit namn, den vert berre kalla pizzaplassen i Hverfisgata 12. Finn adressen og gå opp treppene til eit kvitt hus, så er du på rett veg.
–
Gandhi
Pósthússtræti 15
Den beste indiske restauranten i Reykjavik utan tvil. Maten tar litt tid, så ikkje gå hit om du er akutt svolten. Opnar ikkje før 17:30 som er eit minus for meg som gjerne vil ha mat litt før, men det er verd å vente på. Har prøvd omtrent halve menyen i løpet av mitt opphald – og ingenting har skuffa.
Tips: musikken her er ganske fæl, men heldigvis ganske låg. Ikkje sett deg rett under høgtalarane om det er mogeleg å velje eit anna bord.
–
Prikið
Bankastræti 12
Den beste burgaren i Reykjavik, kanskje den beste på Island til og med. Også ein hyggeleg stad å ta ein øl i kveldinga, gjerne i kombinasjon med den berømte burgaren.
–
Gló
Laugavegur 20b
Enkle og billege vegetariske og veganske rettar, servert på flekken. Mange nyttar dette som dagleg lunsjstad, og er perfekt for studentlommebøker som vil ha god sunn mat raskt.
Valdís
Grandagarður 21
Is is is! Er det fint vær? Spaser ned til dette herlege havneområdet og nyt ein fantastisk is. I mine auger blir det aldri for kaldt for is, men i regnvær er både spaserturen og isetinga utandørs kanskje litt kjeisam.
–
Spúútnik
Laugavegur
Ganske stor men ganske oversiktleg vintagebutikk. Muligens min personlege favoritt. Super stad å gå på skattejakt – og sjansane er store for at ein finn noko nedgravd. Prisane her er ganske bra, og nokre gonger har dei det som heiter Kilo-marknad, altså ein betaler pr. kg klær. Då kan ein tjene mykje på å gå for dei litt tynne skjørta eller dei fluffy strikkegensarane – som gjerne ikkje veg like mykje som dei er verd!
Prisane er etter mi meining litt høge for seconhand. Men prisnivået på Island er om lag som i Noreg, så eg forventa igrunn ikkje noko anna.
–
Kiosk
Laugavegur 65
Ein butikk i felleseige av fleire islandske designarar. Det er stor variasjon av stilar og produkt – alt frå vinterkåper til badedrakter. Ein stad ein bør stikke innom rett og slett for å sjå kva Reykjavik-baserte designarar driver med, bli inspirert og kanskje finne den perfekte gensaren mellom alt det rare (det gjorde i alle fall eg).
Tips: Kyrja er til salgs her, ein av mine island-favorittar.
–
Geysir
Skólavörðurstíg 9
God blanding av Islandske designarar og internasjonale hits som Red Wings og Barbour. Danske Ganni har sneke seg med her også. Klær på Island bær preg av å setje funksjonalitet og haldbarheit først, fordi det er det som fungerer her. Geysir tilbyr varme klær i eit heimekosleg lokale.
–
Myrin
Hafnarhus (Geirsgata 9)
Kringlan (shopping senter)
Har litt diverse nips og naps til heimen, samt klær frå finske Samuji. Hadde ikkje høyrd om Samuji før eg flytta til Island, men vart ganske kjapt forelska. Prisnivået er over gjennomsnittleg høgt som i dei fleste butikkar på Island, men kvalitetsnivået ligg like høgt. Dessutan er det heilt gratis å sjå og bli inspirert.
GK Reykjavik
Bankastræti 11
Klassiske klær frå merker som Wood Wood og Won Hundred ++, om ein skal ha med seg litt god gamaldags shopping.
KronKron
Laugavegur 63B
Om ein er ute etter litt designarklede er dette butikken å stikke innom. Atmosfæren står i stor kontrast til det typiske skandinaviske klessiske som ofte er i designarbutikkane her heime, og ein finn noko for einkvar smak og stil.
–
12 Tónar
Skólavörðurstíg 15
Musikkbutikk med utval både av CD og LP. Om ein smyger seg ned ei vindetrapp har dei eit eige lyttehjørne der ein kan lytte gjennom både LP- og CD-platene før ein eventuelt kjøper noko. Det kjennes som ein privat liten klubb i kjellaren, og det er lov å berre nyte musikk utan nokon intensjonar om kjøp også.
–
Eymundsson
Austurstræti 18
+
Skólavörðurstíg 11
I Austurstræti har Eymundsson fire etasjar med bøker og magasin, og det er absolutt det største utvalet ein finn. Ikkje la deg lure av turistbøkene ved inngangen, resten av bygget er ikkje turistprega. Te & Kaffi har ein avdeling i øverste etasje, og det er lov å plukke med seg magasin (max 3) og lese dei her gratis.
Tips: om du vil kjøpe magasin trekk fram det bakerste, dei to fremste er mest truleg lest eit par gonger i kafeen. Oftast er det ingen skader, men det er kjedeleg om ei side eller to skal ha krølla seg.
Spark Design Space
Klapparstígur 33
Her får islandske designarar, kunstnarar og fotografar vist seg fram. Dei har mellom anna kunstkart frå byar over heile verda, som er passe enkle og fine. Prisane er høge, men dette er ein butikk det er lov å berre sjå i.
–
–
Nokre av silketrykk-testane eg laga til eit prosjekt i januar. Det kreves litt feiltrykk før ein får det til, men dei er fine å ha med seg vidare dei også.
Det er 1457 km frå Bergen til Reykjavik. Det er 1457 km frå kroppen til hovudet mitt.
Island-filmrullane klarte seg ikkje så bra gjennom transportetappen. To av tre kom tilbake frå framkalling blanke, og eg prisa meg lukkeleg for at eg har tatt så mange digitale bilder under opphaldet. Kjipt er det likevel, for eg veit dei hadde blitt så bra om dei berre hadde fått blitt med meg heim! Dei som kom fram er eg i alle fall nøgd med, så får eg heller reise opp igjen å ta fleire bilder til sommaren.
Island i svartkvitt. Ventar framleis på dei analoge bilda, det tar litt tid å få dei framkalla. Gler meg til å sjå dei, om dei i det heile tatt overlevde reisa utan å lekke fulle av lys! I mellomtida får eg berre bla litt tilbake i arkiva.
Dette er bilde av eit av mine favorittbygg i Reykjavik: Norræna húsið, teikna av Alvar Aalto på sekstitalet. Hit pleide eg å ende opp på søndagsturar med kamera over skuldra. Min siste dag i byen gjekk eg også hit for å forevige synet i vinterlys.
Etter julefeiring heime i Sogn reiste me i går til hytta på austlandet. Her er det internett sånn når det passar seg, straum på solcellepanel, kvite busker og varme peisar. Akkurat det ein treng etter fleire dagar på reis med flyttelass. Om internett tillét dukkar det opp litt Island-bilder i romjula, i januar skal eg i alle fall få framkalla dei analoge – det gler eg meg til!
Island kan vere eit litt tricky land å oppleve om ein ikkje har vore her før og ikkje veit heilt kva ein vil prioritere. Som ei slags julegåve og guide-start har eg satt opp eit mini weekend-forslag som eg sjølv ville ha brukt om eg kom til Reykjavik for berre ei helg. Tilpassa dei sertifikat-lause som meg sjølv. God jul!
Ankomst: bydag
Reykjavik er ein pitteliten by, og om ein vandrar ned hovudgata har ein igrunn fått med seg det viktigaste. Hopp innom Kiosk for islandsk klesdesign, GK Reykjavík, Maja, Spútnik, Geysir og Aftur om shoppinghummøret er der, og ta ein kaffi på Reykjavik Roasters før du sjekkar ut Halgrimskirkja på toppen av byen. Lunsj på Babalú eller Sundholt, middag på Grillmarknaden eller Gandhi (indisk). Gå langs havna og sjekk ut Harpa for arkitektur, og på vegen kan ein gjerne hoppe innom Reykjavik Art museum.
Kort tur: Reykjanes / Golden Circle
Mange tenkjer at ein absolutt må ta golden circle-turen og få med seg geysir, gullfoss etc. men: (til tross for at det er ein vakker tur) om du har begrensa tid ville eg ha prioritert å sjå Reykjanes-kysten. Det er kanskje min favorittstad. Og om du er up for it finns det ein kombinasjonstur der ein får begge deler! Resten av dagen bør gå til bykveld, heimekino med pizza frå Eldsmidjan og oppladning til langtur. Ta med deg badedrakta til Sundhöll for litt oldschool svømmebasseng-feel og utandørs avslapning i varme kjelder.
Reiser: Golden Cricle, Reykjanes eller Ja takk, begge deler!
Lang tur: Snæfelsnes / sørkysten
Turen går anten sørover eller nordover, og det er nesten heilt umogeleg for meg å velje ein favoritt. Turane er like lange, kostar om lag det same, og inkluderer begge heilt unike kystlandskap. Om du reiser sørover får ein svarte lavasandstrender, fossar og isbre, om du reiser nordover får du små kystbyar, fjell og fugleliv.
Reiser: South coast, Snæfellsnes
I dag er min siste dag i Reykjavik, i morgon tidleg flyr eg heim til Noreg. Eg har fått sett Island frå alle sider mogeleg, sommar haust og vinter, vulkanutbrot, storm, boblande geysirar og rykande mosehaugar. Alt eg drøymde om og litt til. Med meg i kofferten har eg også sju filmrullar oppbrukt med Hasselblad, så dette betyr ikkje slutten for Island-bilder, langt ifrå. Eg kjem til å sakne deg, Reykjavik!
Takk fyrir mig. Sjáumst seinna.
Island-sørkyst i vinterdrakt. Eg vert aldri mindre fasinert av kontrasten den svarte lavagrunnen på denne øya gir. Kolsvart sand, stein, klipper. Endå svartare verker dei saman med krittkvit snø og bølgjeskum, ein finn ikkje landskap som dette kvar som helst. Island, du er så vakker!
Hugs å legge igjen ei stemme til meg her om du har tid, to klikk!
Island er skikkeleg island for tida, med snø og bitande vindar – og eg tykkjer det er helit supert. Eg kryssa fingrane for skikkeleg desembervær før eg skulle heim igjen, og det har eg verkeleg fått. Med det kvite teppet kom mykje av dagslyset tilbake, dette fantastiske mjuke vinterlyset med skumringa lurande rundt hjørnet. Snøen legg seg i håret og i jakkelommene som små perler som ikkje vil smelte heilt endå. Så får ein heller tåle litt vind – det er jo tross alt Island.
