Category Archives: Grafisk design

Det nyaste tilskotet i Chain Wallet-coversamlinga er Muted Colours, sei hei!

 

I går henta eg magasinet som høyrer til bacheloroppgåva mi på trykkeri i Årdal, det er no akkurat ei veke til eg er ferdig! I heile dag har eg kutta ut små ruter i framsida og delt opp bussetestoff som skal vere med i coveret. Eg finn trykkleif og vert irritert på meg sjølv for å ikkje ha trippelsjekka, men i denne visuelle delen er det heldigvis designet som teller. Det er framleis litt igjen, men det er så nære så nære. Eg har faktisk skrive ein heil liten bachelor om busseter. Det er eg ganske nøgd med.

 

 

7-8. mars tok eg turen til Trondheim; for å rigge opp fotoutstilling, seie hallo til ein av mine favorittpersonar, snike meg rundt i gangane på Frimurerlogen, sjå på alle som plukka med seg programmet eg har designa, eller som myste på fotografia mine. Allereie i sommar starta eg å skisse opp forslag til logo og stilretningar, og å sjå alt nøste seg saman til slutt kjennes verkeleg bra. 33 frivillige sprang rundt i kvite t-skjorter med logo på, det blir liksom noko anna enn å sjå den som ei flat png-fil på dataskjermen.

 

 

Scanna inn programheftet eg laga for Phonofestivalen 2016, slik såg det ut!

 

(plakatskisse for årets sommarjazzkurs)

 

Det skjer mykje på jobbfronten etter ein ganske stille periode i januar. Å skrive bachelor og styre tida heilt sjølv er verkeleg bra, når ting roar seg har eg store ambisjonar om å strukturere kvardagen ordentleg og få rydda litt opp i støvete krokar. Ting tar form.

 

 

Som siste prosjekt før eg skriv bachelor gjer eg total remake av min portfolio. Eigenprofilering om du vil. Eg har stått på hovudet ned i gamle arkiv for å prøve å få fatt i så mykje som mogeleg av det eg har laga gjennom min førebels korte karriere som grafisk designar.

Der nede fann eg også eit nedstøva minne om kor glad eg var (og er) i analog fotografering. Kor stor del av livet mitt det brukte å vera. Så no vert arbeida mine foreviga med litt for skarp blits og kornete overflater, det kjennes meir som meg. Den delen eg hadde gløymd litt vekk men er så glad for at eg fann att.

 

 

Ein får gjere mykje kjekt som designar for eit plateselskap som Klangkollektivet. Dette inkluderer i år design av trykk til koppar! Perfekt match til Klangkollektivets vinylkaffi, men passar veldig bra til annan kaffi også. I dag hadde eg dei med i fotostudio, er nemleg i gang med å ta nye foto til min eigen portfolio – som er ein god anledning for å knipse eit par ekstra også.

 

 

 

Bergens kulaste band Chain Wallet gir endeleg ut ny singel, eg har laga cover og alt er ein fest. Skru opp lyden og nyt!

 

 

 

 

 

 

Første titt på designet for Psykologidagene 2016 i Trondheim! Første release er kun logo og tilhøyrande namnetrekk, men planane er store og dette ligg an til å bli eit av dei kjekkaste designprosjekta eg har arbeida med. Dette er også mitt første trønderoppdrag, kryssar fingrane for fleire. Om ein vil sjå meir er det berre å klikke seg inn på deira facebook-side!

 

I sommar skal eg berre freelance. Ligge på brygga på hytta og ikkje bruke pengar og tjene akkurat nok til å betale husleige og ein svipp til Island. Lage bra greier og ha tid til å gjere ingenting. Det blir så bra.

 

I påskeferien vart det mykje freelancing, og det som tok mest tid var dette heftet som presenterer alle dei regionale jazzsentera i Noreg. Eg har gjort litt for Vestnorsk Jazzsenter før, og det var kjekt å utvide horisonten.

 

 

Laga ein gif av alle instrumenta eg teikna til jazzplakaten.

 

Den siste veka har eg vore på studietur i Krakow, men meir om det ein annan gong. Rett før me reiste gjekk mitt andre arbeid for Norsk Jazzforum / Vestnorsk Jazzsenter i trykken, plakat + flyer for jazzkurs dei arrangerer i sommar. Om lag slik vart dei, no ventar påskeferien med meir freelancing.

 

Logoar er kanskje det eg har gjort minst av som grafisk designar, føler ikkje heilt eg får dreisen på det. Likevel seier eg ja takk til eit oppdrag når det byr seg, og etter litt over ein månad med arbeid vaks denne logoen fram. Oppbygd av to litt modifiserte fontar skapar bokstavane ein veg, som representerer Den Musikalske Stamvegen.

 

 

Phonofestivalen hoppar over eit årstal og set festivalen til januar 2016! Fredag slapp dei nyhende og design, og eg er super-pepp på å få vere med på laget i år igjen. Designet eg har laga er baster på rasteriserte trefiber i kontrastfargar, eit møte mellom det organiske og det digitale.

 

 

Gjorde vindusfolie for Pepper, som for augneblinken har pop up outlet i Nygårdsgaten. Det blir meir Pepper-grafikk denne våren, for det skjer mykje spanande med butikken.

 

Ein superkjapp typografi-basert poster eg laga for The Big Almost og Cakewalk sin konsert på Landmark. Når ting hastar er det bra å ha nokre smarte effektive triks på lur.

 

 

I dag var eg med å hente åtti ferdigtrykka handlenett på Robotbutikken, starten på eit fantastisk samarbeid med bandet Chain Wallet. Printet laga eg  for ei stund sidan på Island, men ting tar tid og endeleg var det ferdig. Eg er super-nøgd og har blitt gratulert for vel utført design opptil fleire gonger. Dette blir bra!

 

 

 

 

 

 

 

Nyleg har eg blitt hanka inn som designar for eit samarbeidskonsept mellom Griegakademiet og Vestnorsk Jazzsenter, konsertserien GIG-akademiet. Dette blir første plakat + logo for serien. Har litt grafisk-greier på lur som snart kan visast fram, kjennes bra å ha tid til å freelance litt.

 

 

 

 

Plutseleg var det desember og tid for julekalendar-design. Kalendaren er eit samarbeid med Klangkollektivet og Robotbutikken i Bergen, kvar søndag i advent dukkar det opp eit nytt bra tilbod. Desember har alltid vore så langt fram i tid, heile opplegget tok meg litt på senga! Men det blir ein bra månad.

 

 

 

Phonofestivalen var jo i september, men eg har ikkje tatt meg tid til å fikse litt betre portfolio-bilder før no. Fint å ta fram att og hugse på kor kjekt det var å lage. Phono gir meg lov til å eksperimentere og prøve ut ting eg ikkje er sikker på om eg får til på førehand, og eg har lært meir frå mine to år som festivalgrafikar enn eg har nokon annan stad. Kanskje fordi ein lærer betre når ein hoppar i det og har det kjekt.

 

 

 

Klangkollektivet gir kvart år ut ein miks med smakebitar frå årets utgivingar. Slik ser nummer tre ut, i tråd med resten av designet eg laga for dei tidlegare i haust. Det er nok litt lavastein-inspirasjon inne i bildet her, Island har gitt meg mykje bra input.

 

 

 

 

Me har eit utrulig teknisk kurs på skulen for tida. Me bygger små maskiner som me kodar over eit dataprogram og får dei til å gjere det me vil. Sånnt ein driver med om ein vil lære å bygge robotar etc. Og det er uhyre vanskeleg. Kva det har med visuell kommunikasjon å gjere vil tida vise, men som print-designar er eg på djupt vatn. Trøsta meg med å dra fram teiknebrettet og skrible litt – alt for lenge sidan!